Төрийн Думын сонгуульд эрх баригч “Нэгдсэн Орос” нам тэргүүлж байна
Мэдээллийн алба
ОХУ-ын Төрийн Думын ес дэх удаагийн сонгуулийн урьдчилсан дүнгээр эрх баригч “Нэгдсэн Орос” нам 57.83 хувийн санал авч, парламентын 450 суудлын 355-ыг авах төлөвтэй байна. Оросын Сонгуулийн төв комиссын дарга Элла Памфилова есдүгээр сарын 21-нд саналын 95.18 хувийг тоолсны дараах дүнг танилцуулжээ.
Урьдчилсан мэдээллээр “Нэгдсэн Орос” нам нэг мандаттай 208 тойрогт ялалт байгуулж, Төрийн Дум дахь олонхын байр сууриа хадгалж байна. Ингэснээр тус нам Үндсэн хуульд өөрчлөлт оруулахад шаардагдах гуравны хоёрын олонхоо мөн хадгалах төлөвтэй байна.
Коммунист нам 13.81 хувийн санал авч 40 суудал, Либерал ардчилсан нам 8.98 хувийн саналтайгаар 25 суудал, “Шинэ хүмүүс” нам 7.96 хувийн саналтайгаар 20 суудал авах урьдчилсан дүн гарчээ. Памфилова эдгээр нь эцсийн бус үзүүлэлт бөгөөд үлдсэн саналын дүнгээс шалтгаалан бага хэмжээний өөрчлөлт орж болохыг онцолсон байна.
Сонгогчдын ирц 59.32 хувь хүрсэн бөгөөд санал хураалт есдүгээр сарын 18-20-нд гурван өдөр үргэлжилжээ. Сонгуулийн эцсийн дүнг есдүгээр сарын 25-нд баталгаажуулан зарлахаар төлөвлөж байна.
Энэ нь Орос улс 2022 онд Украинд өргөн хүрээний цэргийн ажиллагаа эхлүүлснээс хойш зохион байгуулсан анхны үндэсний парламентын сонгууль юм. Мөн сонгуулийн талаар Оросын сөрөг хүчний төлөөлөгчид болон зарим барууны орон шүүмжлэлтэй хандаж байгаа боловч Оросын эрх баригчид санал хураалт хуульд нийцсэн гэж мэдэгдсэн байна.
