АНУ Владимир Путиныг Майамид болох “Их 20”-ийн уулзалтад урьжээ
Мэдээллийн алба
АНУ ОХУ-ын Ерөнхийлөгч Владимир Путиныг ирэх арванхоёрдугаар сард Майами хотноо болох “Их 20”-ийн дээд хэмжээний уулзалтад оролцохыг урьсан талаар АНУ-ын Төрийн нарийн бичгийн дарга Марко Рубио мэдээлжээ. Кремлийн зүгээс урилгыг авч үзэж байгаагаа мэдэгдсэн байна.
Марко Рубио Нью-Йорк хотноо сэтгүүлчдэд мэдээлэл өгөхдөө санал зөрөлдөөнтэй талууд ч асуудлыг шийдвэрлэхийн тулд уулзах шаардлагатайг онцолж, Путин “Их 20”-ийн уулзалтад оролцвол АНУ-ын Ерөнхийлөгч Дональд Трамп төдийгүй бусад улсын удирдагчидтай хэлэлцээ хийх боломж бүрдэнэ гэжээ.
Рубио мөн ОХУ-ын Гадаад хэргийн сайд Сергей Лавровтой НҮБ-ын Ерөнхий Ассамблейн чуулганы үеэр уулзсаны дараа дээрх мэдээллийг өгсөн байна. Талууд Украины дайныг зогсоох дипломат боломж болон хязгаарлагдмал гал зогсоох саналын талаар байр сууриа солилцжээ.
Кремлийн хэвлэлийн төлөөлөгч Дмитрий Песков Москва урилгыг авч үзнэ гэж мэдэгдсэн ч Путин өөрөө уулзалтад оролцох эсэхийг одоогоор батлаагүй байна. Тиймээс урилга илгээсэн нь түүний Майамид очих нь эцэслэн шийдэгдсэн гэсэн үг биш юм.
Путиныг Украины хүүхдүүдийг Оросын нутаг дэвсгэрт хууль бусаар шилжүүлсэн гэх хэрэгтэй холбоотойгоор Олон улсын эрүүгийн шүүх 2023 онд баривчлах захирамж гаргасан. Харин АНУ тус шүүхийн гишүүн улс биш тул уг захирамжыг өөрийн нутаг дэвсгэрт шууд хэрэгжүүлэх үүрэг хүлээдэггүй байна.
АНУ 2026 онд “Их 20”-ийг даргалж байгаа бөгөөд удирдагчдын дээд хэмжээний уулзалтыг арванхоёрдугаар сард Майамид зохион байгуулахаар төлөвлөжээ.
