МУГТ Л. Энхрийлэн ДАШТ-нээс хүрэл медаль хүртлээ
Мэдээллийн алба
Монгол Улсын Гавьяат тамирчин Л. Энхрийлэн Азербайжаны Баку хотноо болсон жүдогийн Дэлхийн Аварга Шалгаруулах Тэмцээн (ДАШТ)-ээс хүрэл медаль хүртлээ.
Чансааны дарааллаар "С" хэсгээ тэргүүлсэн Л.Энхрийлэн эхний тойрогт хийлээд Испанийн Санчес Бенитес Арьелаг, дараагийн даваанд Косовогийн Лаура Фазлиуг ялсан. Харин хэсгийн аваргын төлөө Израилийн Керем Примод ялагдаж, дагах тойрогт Францын алдарт аварга Кларисс Агбегненоуг юүко үнэлгээгээр илүүрхсэн юм.
Хүрлийн төлөөх хариуцлагатай барилдаанд Нидерландын Жоанне Ван Лешоутыг мөн юүко үнэлгээгээр давснаар дэлхийн дэвжээнээс гурав дахь медалиа хүртлээ.
Бакуд үргэлжилж байгаа ДАШТ-ээс одоогийн байдлаар 15 улс медаль хүртжээ. Тодруулбал Япончууд зургаан алт, хоёр хүрлээр тэргүүлж байгаа бол Азербайжан нэг алт, нэг мөнгө, хоёр хүрэл, Гүрж нэг алт, нэг мөнгө, нэг хүрэл медалиар эхний гуравт жагсаж байна.
Харин Монголын шигшээ баг 13-т бичигдэж байна.
