Британийн иргэн 78 жилийн турш шүдэнзээр 544 хөлөг онгоцны загвар урлажээ
Мэдээллийн алба
Их Британийн өндөр настан Филип Уоррен амьдралынхаа 78 жилийг шүдэнзээр хөлөг онгоцны загвар бүтээхэд зориулжээ. Өдгөө 96 настай тэрбээр олон жилийн хөдөлмөрөөр бий болгосон цуглуулгаа олон нийтэд байнга үзүүлэх музей, үзэсгэлэнгийн газар хайж эхэлсэн байна.
Английн Дорсет гүнлэгийн Бландфорд хотод амьдардаг Уоррен 1948 онд 17 настай байхдаа шүдэнзээр хөлөг онгоц бүтээж эхэлжээ. Тэр цагаас хойш нийт 544 загвар урласан бөгөөд одоогоор 450 хөлөг онгоцны цуглуулгатай аж. Түүний бүтээлүүдэд Их Британийн тэнгисийн цэргийн алдартай байлдааны хөлөг, нисэх онгоц тээгч болон бусад төрлийн хөлөг багтдаг.
Уоррен хөлөг онгоцны загваруудыг зөвхөн шүдэнз, шүдэнзний хайрцгийн материалаар хийж, нарийн ширийн эд ангийг нь гараар урладаг. Тэрбээр хөлөг онгоцноос гадна 1200 гаруй нисэх онгоцны загвар бүтээжээ.
Түүний урласан загварууд 1953 оноос хойш Их Британийн олон хотод зохион байгуулсан үзэсгэлэнгүүдэд тавигдаж, үзэгчдийн сонирхлыг татсаар ирсэн юм.
Гэвч нас ахихын хэрээр жижиг эд ангийг нарийн урлах, ялангуяа загваруудаа будах ажил улам хүндрэлтэй болжээ. Хэдэн жилийн өмнө бүтээсэн нэг загварынхаа чанарт сэтгэл хангалуун бус үлдсэн тул дахин шинэ загвар хийхээ болихоор шийдсэн аж.
Өдгөө тэрбээр жилд нэг удаа Сомерсетийн Йовилтон хотод зохион байгуулдаг үзэсгэлэнд цуглуулгаа дэлгэдэг. Харин үлдсэн хугацаанд бүтээлүүд нь хадгалалтад байдаг учраас байнгын үзэсгэлэнгийн газар олохыг хүсжээ.
Уоррен цуглуулгаа музейн агуулах, хонгилд хадгалуулахыг хүсэхгүй байгаагаа онцолсон юм. Тэрбээр олон жилийн хөдөлмөрөөр бүтээсэн загваруудаа хүмүүс үзэж, сонирхох боломжтой газарт байрлуулахыг зорьж байгаа бөгөөд музейгээс гадна жуулчид, зочдод зориулсан үзэсгэлэнгийн төв ч байж болохыг хэлжээ.
