Уур амьсгалын өөрчлөлтийн тухай НҮБ-ын суурь конвенцын талуудын 31 дүгээр бага хурал (Unfccc Cop31)-ын дэлхийн удирдагчдын дээд түвшний уулзалт эхэллээ

Уур амьсгалын өөрчлөлтийн тухай НҮБ-ын суурь конвенцын Талуудын 31 дүгээр бага хурал (UNFCCC COP31) 2026 оны 11 дүгээр сарын 9-ний өдөр Бүгд Найрамдах Турк Улсын Анталья хотноо эхэлж, тус бага хурлын хүрээнд зохион байгуулж буй Дэлхийн удирдагчдын дээд түвшний уулзалт 11 дүгээр сарын 11-ний өдөр эхэллээ.

Бага хурлын хүрээнд 11 дүгээр сарын 11-12-ны өдөр зохион байгуулах Дэлхийн удирдагчдын дээд түвшний уулзалтад Монгол Улсын Гадаад харилцааны сайд бөгөөд Цөлжилттэй тэмцэх тухай НҮБ-ын конвенцын Талуудын 17 дугаар бага хурлын (UNCCD COP17) Дарга Б.Батцэцэг тэргүүтэй төлөөлөгчид оролцож байна

Тус бага хуралд Конвенцод нэгдэн орсон 198 талууд, олон улсын байгууллага, иргэний нийгэм, хувийн хэвшлийн төлөөлөл зэрэг нийт 100 мянга орчим төлөөлөгч оролцож байна. Бага хурлаар Парисын хэлэлцээрийн хэрэгжилтийг эрчимжүүлэх, хүлэмжийн хийн ялгарлыг бууруулах, уур амьсгалын өөрчлөлтөд дасан зохицох, санхүүжилт, технологийн дэмжлэгийг нэмэгдүүлэх зэрэг асуудлыг хэлэлцэж байна.

Энэ удаагийн бага хурлыг “Ирээдүйн COP”, “Хэрэгжилтийн COP” үзэл баримтлалын хүрээнд “Яриа хэлэлцээ, зөвшилцөл, үйл ажиллагаа” гэсэн гурван үндсэн зарчимд тулгуурлан зохион байгуулж байна. COP31-ийн нэг онцлог нь Турк, Австралийн хамтарсан удирдлагын загвараар ажиллаж, Турк Улс бага хурлыг даргалж, Австрали Улс хэлэлцээний үйл явцыг удирдаж буй явдал юм.

Дэлхийн удирдагчдын дээд түвшний уулзалтад 40 гаруй улсын Ерөнхийлөгч, 30 гаруй улсын Ерөнхий сайд болон бусад өндөр түвшний төлөөлөгчид оролцож байна. Тухайлбал, Бразил, Египет, Финланд, Австри, Узбекистан, Азербайжан, Казахстан, Туркменистан, Кени, Нигери зэрэг улсын Ерөнхийлөгч, Ерөнхий сайд нар, түүнчлэн Европын Комиссын Ерөнхийлөгч Урсула фон дер Лайен, НҮБ-ын Ерөнхий нарийн бичгийн дарга Антонио Гутерреш нар оролцож, уур амьсгалын өөрчлөлтийн эсрэг олон улсын хамтын ажиллагаа, Парисын хэлэлцээрийн хэрэгжилтийг эрчимжүүлэх асуудлаар санал солилцож байна